Роберто Рекиони (Roberto Recchioni), роден во 1974 год. во Рим, е сценарист, романсиер, стрип автор, илустратор, креатор на содржини, развивач на игри, колумнист, филмски критичар, и режисер. Неговото главно поле на интерес е деветтата уметност и важи за „рок ѕвезда на италијанскиот стрип“.

Дебито на Рекиони како стрип автор доаѓа во 1994 год. со издавањето на „Темна страна“ (Dark Side) за BDB Presse во соработка со Леомакс. Автор е на серијалите „Џон До“ (John Doe), „Детектив Данте“ (Detective Dante), „Батаља“ (Battaglia), „Дејвид Марфи: 911“ (David Murphy: 911), и „Сирачиња“ (Orfani). Автор е и на низа графички романи, вклучително и „Монолит“ (Monolith) по која во 2016 год. е снимен филм.

Славата ја стекнува како главен уредник и сценарист на сите едиции поврзани со ликот Дилан Дог што ги издава Sergio Bonelli Editore. Епизодата „Матер Морби“ (Mater Morbi), изведена во соработка со цртачот Масимо Карневале, е издадена и како графички роман што има освоено низа награди и е преведуван ширум светот. Рекиони е сценарист и на популарниот кросовер меѓу Дилан Дог и Бетмен на DC Comics, остварен заедно со цртачот Џиџи Кавенаго. Други икони за кои Рекиони има пишувано се Текс, Дијаболик, и Мики Маус.

Во 2012 год. заедно со Андреа Акарди го создаваат стрипот „Искупувањето на самурајот“ (La rendenzione del samurai) што претставува прва епизода од серијалот „Чанбара“ (Chanbara). Интегралното издание од првите две епизоди на „Чанбара“ е објавено како графички роман ширум Европа.